Sarakka

Dunya ini labayan,
sin magtutulak hantian.

Tandas in pakaradjaan,
Waiy sallamata mattan.

Ayaw magkasusahan,
Bang sin tao Dih tungbasan.

Ayaw magkasusahan,
Bang hat dakuman kabantugan.

Pakuga in pangatayan,
Pa pagkahi aun hikatukbal.

Labiafdal in lima ha babaw,
Daing sin in timatayak ikaw.

Dih mo ra san mara matay,
In sarakka ikaw in unungan.

Sarakkah sawasa in ikhlas,
Fiy sabilillah waikulanas.

Sin tuu niya hitukbal,
pa lawa wairuun mabut habal.

Bang masabbut in kabantugan,
Kamaumuhan magpakahimumungan.

Bang bukun siya in timabang,
Dih sa yaun mahinang bihan.

Bang mo sadja tiyali maraw,
Sin iblis siyasat sadja kaw.

In hinang mo sarakka marayaw,
Ha adlaw mahuli bat mapasaw.

Advertisements

Tatandasan

Ha laum kasigpitan,
Ayaw landu maglindurandam.
In yan tartantu tatandasan,
Bang biyadiin in kasabar.

Ha laum dayaw parasahan,
Ayaw ra kaw landu kugan.
In yan tartantu tatandasan,
Bang biyadiin magsukur pa Tuhan.

Ayaw kalupahan hi baran,
Hambuuk rukun sin pag-eeman,
Mangi & marayaw in kumugdan,
Magrida ha qadar daing ha Tuhan.

Amura in palihalaun sin Tuhan,
Masigpit & marayaw in kahalan,
Tattap sawasa nanumtum pa Tuhan,
Hi Dhannun hambuuk pamintangan.

Iskul

“Mag-iskul” in mahasil duwa,
Education parkala pag-dunya.
Ignorance parkala Akhirat.

Ignorance parkala pagakhirat,
In pag-agama dih na maharap,
Busy ha pag-iskulan in sabab.

Aun excuse, makahati in Allah.
Daran naligap yaun pa in sasat,
Bukun na excuse, nabiyaksa na.

Haupuun ta naka-graduate na,
Busy naisab ha paglagan usaha,
In kasabunnalan nabiyaksa na.

Nabiyaksa na, nahinang addat.
Waiy paruli sin adlaw akhirat.
Magpakasayo isab hangkasasaat.

Bang biyaksa na magpahilpahil,
Ignorance ha Agama in mahasil,
Ha ngan dakuman in pagkamuslim.

 

“Bang ikaw nakura’?”

kunu: Biyadiin humatul in hula?
Mismo in kanakuraan nagbabanta.
Ampa in pagbanta bukun ula-ula,
Magasagdugo raayat in majuljana.

Kug nakaw kapindahan in nakura,
waiyruun banta in makapakawasa,
Sumambu na in hal pangannal ta,
Sakali nakura da in nagdapadapa.

Sibuda hinda nakura’ politician,
Atawa hinda nagdara parhimpunan,
Janji’ iban daawa in karungugan,
Kahalubiluhan nag-mamanyatakan.

Ittipak sa in angut sin katan,
ha hula’ Kahinyukan kasambuhan.
Mahibaha waiyhumunit kabaakan?
Siylah-silah sambat sin aliyan.

Daing ha kastila jipun milikan,
Pa parinta pilipinas namayan.
Wairuun nakabangun nakauntayaw.
Pilana in nagmahi nagkatigallam?

“Kalna’ hula bangsa iban agama”,
Di’ magkapuwat silawak sin kita.
Mataukasi’ ha panagnaan sadja,
Iman napilad in maksud napinda.

“Kalna’ hula bangsa iban agama”,
Bang mahalga in hula iban bangsa,
Subay labimahalga in pag-agama.
Ha tatkala muslim naggulal kita.

In kamaruhan sin hula’ & bangsa,
Huun misan hipagtuuk in ginhawa.
Sagawa’ in sabunnal kamaruhan ta,
Maglugtu palantupun in kalamullah.

In silawak: “Kalna’ sin agama!”
Sah in “ideology” ta milikan da.
In “philosophy” ta european da.
Di’mamarahi in Qur’an & Sunnah.

Bang mattan “kalna’ sin agama”,
In baugbugan Qur’an iban Sunnah,
Doon kita kumawa ilmu’ & hikma,
Amura in makaparayaw sin hal ta.

Qur’an iban sunnah in padduman,
Ha pamaham sin mga kasahabatan,
Sin salaf us-saalih gagandilan,
Kaulamaan nagtabarru’ ha Islam.

Bang mattan “kalna’ sin agama”,
Hatulun in pagagama sin ginhawa,
Halaum bay parayawa in pamarinta,
Usug! Nakura’ da isab tuwi’ kita.