Aramala

seas_erupted

Bang in suga di sumilak sin adlaw pulak-pulak.
In andum nangituman ha katilibut sin kauman.
Aun dumatung hunus makusug in agi sin habal.
Duwraan pa sin alun panjang ha kalaud-lauran.

Tartantu in makapalaum daghal ta kabuwtulan,
Bang mag-uno, pakain na baha in katangkisan?
Di kaw muga  sin tsunami ha Indonesia,  Japan?
Hunus,  tubig iban dagat naglakab ha Tacloban?

In  linug ha  Bohol,  Malaysia,   Nepal  kimugdan.
Waiy  pi’un  misan  hi siyo  in kugdanan  abutan,
Waiy makapa’gang misan hula makusug milikan,
Liyu  daing  ha lappasun sin  Tuhan tagkabayaan.

Bang makabuga in nasabbut aramala  kiyasakupan,
Labimakabuga in hal ha adlaw qiyamah kumugdan,
Hipaingat   katu’  yaun  siyabbut  ha  laum  Qur’an,
In   magtakin  kita  bang  umasip  atawa mahaman.

Maniyu’tiyu’ halhiyuwal adlaw  qiyama sasabbutan,
Mga ayat hawpu’hawpu’ da  maluhay  katumtuman,
Ha  surah  Al-Inshiqaq,  At-Takwir, iban  Al-Infitar.
Mukalaung sadja sin qiyamah jumatu ha panagnaan.

In  suga   luwnun   lupiun    putusun  sin  katigidluman,
In mga bituun mapakpak makanat mapung in singlab,
In  kabud’buran biya’ bagunbun sapuhun  matigallam,
In karagatdagatan magbukal magla’say magbusuwang,

In  langit  yaun  mabuak  laknitun  magduwa   masipak,
In kakuburkuburan gingguun batiun in tao miyamatay,
In mga nyawa iban jasad  mahambuuk ha  tiyumpukan,
Hinang hi baran tasdik ha  pangatayan  in  kiyabutulan.

Hinang hi baran ha adlaw qiyamah patampalun sin Tuhan.
Magtaymanghud, magtalianak,  magtiyaun di na magkilal.
Maguy daing hakaniya’pakaniya,  lawagun in makatabang.
Susun  di’  hikaibarat sin  kabuhi pagdunya in  kiyaligapan.

Asal tuud  kariyasali sin  manusiya ha akhirat  mahaman,
Sabab  yari  in  lanab sin dunya  kiyaulinan  kiyakinaman,
Yari ra isab kunu’ in sulga ha dunya na mag-uno pa kaw?
In akhirat  yadtu  biya’  istori  sadja  sin  mga  kaguruhan.

In manusiya nalanyap  ha  dunya wai pagpikil nafsu in dulan,
Panawagtawag sin kaulamaan kaguruhan wai diyungdungan,
In  Kitab  Hadith  iban Qur’an  kiyapu’kapu  sadja  ha  tau’an,
Susun!  Bang  piyaruli ha  adlaw qiyamah  nalappas  da   man.