Music suara hi iblis

Bismillahi walhamdulillah…
Wassalatu wassalam ala Rasuulillah.

Ayaw mayan taymaun  pa mangi  sin  ditun,
Bang in kasuban music yari namu sabbutun.

Ayaw man taymaun sambat da personalan,
Saplag   ini  pa  katan   lapay  na  in   baran.

Bukun  tuud  pangjaga’jaga  pangjangki,
Huun sin tagna ha music da isab matagi.

Alhamdulillah, in tagi  biya  na’aadik  naig,
Pa malayu biya masriq iban magarib tigsik.

Bang   mayan  sin  Allah  di’  na  hibalik,
Bang man kita katan lisuan da ha music.

In  music  biya kahantang  nahinang  kagunahan,
Misan pakain binaybayan amuin pagkarungugan.

Duun  na  ka   isa’isa  atawa  awun  panun,
Music magtuy in pakatingugun dungugun.

Kalangan  tausug,   milikan,   lannang,   jipun.
Kahupan da kuman in nafsu langan’langanun.

Subay  awn  music   bat  da  in   jantung   kugan,
Ampa magpasandung sin lanab hal pangatayan.

Waktu limabay bihaun susungun pasandungun,
Sari bang  tunang  in panun atawa  tiyutumtum.

Sibu da ha waktu makug nasusa nagdurugal,
Music da in kabayaan dungugun dum adlaw.

Ha pagdungug music kalagan in kahanung,
Bat  hikarayaw  kunu  pikilan  iban jantung.

Sumagawa in pangatayan masi ra lindurandam,
Tanda sin awun labi-afdal  daing ha music tuan.

Sambat sin sila mga kaguruhan ha agama paham,
In   music  kunu  suwara  aayat  sin  iblis  shaitan.

Ha waktu nangjural hi iblis pa Tuhan bat manusiya akkalan,
Diyusta sin Allah hi iblis,  pagpaanib  katu SIYA  nagfarman.

“Kadtui pangabi’ngabi na kaw (iblis) madtu kanila (manusiya)”
“Hisiyu’siyu daing kanila in madupang sin suara mo makawa.”
(Sampay pa kahinapusan sin ayat… [Al-Isra 17:64])

In   pagbahasahun   ha   ayat   nasabbut   “suara  hi  iblis”,
Laung sin mga pantuk ulama na amuna in kalangan music.

Music sapantun  virus  hitanum  katu sin shaitan,
Sumud daing ha tainga lumaruy pa lawum baran.

Anggawta baran malatag sin virus manglammahan,
Bat gumuya’ in eeman maluhay kita  hagashagasan.

Bukug ngumilu, unud manatat, bahibu mulingkag.
Bang kiyaamuhan sin  music nanam di hikaibarat.

Music badjangun sadja  in  taynga ha  pagdungugan,
Sumagawa in pangatayan masimasi ra lindurandam.

Kita ba kaw langgung in  lingkat sa dungugun,
Qawul sin Tag-iypun makahansul bigi jantung.

Qur’an bassahun sin iypun bang SIYA tumtumun,
In pangatayan sinupun diiy kalagan in kahanung.

In aayat sin  Allah  tiyantu  in  kahanung  mattan,
Mapalihala in pangatayan daing ha lindurandam.

“Sabunnalbunnal tuud, ha panumtum da pa Allah”
“in pangatayan tantu  aun  kahanungan  sallamata”
[Qur’an 13:28]

Ampa in kanyuknyukan tuud sin pagtumtum pa Allah,
Amuna in pagsumba  tulus’ikhlas  pa  Katunggal  Niya.

Tartantu  in  music  hikaligap  sin  pangatayan  iban  pikilan,
Mahinang sabab hikalupa ta mag-isbat mag-nafi pa Tuhan.

Alhasil  ha  waktu  sin  tao  ha  music kiyabibisahan,
Bunnalsa pagdunya in piyalbut sin anggawta baran.

Mahuli,  bang  man ta madauhat  da in kahanung pangatayan,
Hikalamud ha nasabbut sin ayat nanumtum Kaniya sabunnal.

Qawul sin Allah in halgaan bassahun iban dungugun,
Music suara  hi  iblis  ha  kabuhi  ta  hibugit  lupahun.

Advertisements