In kaawam uujjuan sa ha’?

Bang iminglis hi tausug atawa hi bisaya pilipino,
Pag-katawahan   ujjuun  sin   kamatauran  kailu.

Makusug laung niya pa L na mara kita sambiR,
Makusug  kunu  pa I na matugas pa  daing stiil.

Awam mag-inglis pangu’udjuan nahinang kalalamihan,
Sibu’ da hinda  awam kanda pandikal  mag’au’iyudjuan.

Balingkuga magbissara inglis  timanda in kaawam.
Luba’ na bang di makabassa pal’pal na tuud awam.

Sakaula’ula  in  tao  yaun  wairuun  kapus  paiddahan,
Wairuun kapuspaiddahan bang wairuun ilmu milikan.

Malanu’ masawa ha pamaham sin katan manusiya,
In ilmu  dunya  mahalga tuud  ha  kabuhi  sin  kita.

Sumagawa’  diyungdungan  tiyali’  ta  ra baha  tuud  piyaham?
Bang bandingun in uudjuan awam ha anggalis iban ha Islam?

Biyadiin na baha kailu bang  balingkuga magbassa  Qur’an?
Biyaddin na baha bang palpal awam di makabassa Qur’an?

Bang in awam mag-inglis malaggu kasipugan paglamilamihan,
Biyadiin na baha in  kaawam  ha piyag’aagamahan  mo  Islam?

Kaawam ha agama Islam biya’ madtu piyagtuuran in piyag’iyan,
Bukun in hati bat subay guru ulama kita ha agama Islam  katan.

Ayaw magpasad ha kaawam bang pagka-Muslim sin baran in pagbissarahan,
Tuan  tumtumun  in   kasipugan  ha  adlaw  mahuli  ha   hadarat  sin   Tuhan.

Mahunit bang didtu na  ampa kita makatali makapamung pa ginhawa  baran,
Bang ha dunya piyaruli ko marayaw in pag-agama ko waiy nag-awam’awam.

Sifat sin waiy pamaratsaya, In patumtum daing ha Tuhan waiy halga kanila.
Nagbabarud’barud  matugas  takabbur  in  kaawnan  nila   diy   ha  dunya.

Susun nila di hikaibarat ha adlaw akhirat asal piyatampal katu sin Allah,
Pamintangan  sa  laggu’laggu ha mga namamaratsaya,  Diy pa ha dunya.

“Sa’ sila mamung, Bang sadja kami dimungug iban nanali’tali’ marayaw,”
“Bukun kami diy namusa lundang’panun ha laum kayu naglalagablaban.”
[Qur’an 67:10]

Panuntut Ilmu

Bismillah,
wassalatu wassalam ala rasuulillah.

In muna’muna ayat piyaturun sin Tuhan,
Pa nabi Muhammad (sallahu alaihi wasallam).

“Bassa kaw ha ngan sin Tuhan mo nagpapanjari”
Halga sin pagtuntut ilmu in ayat ini manunjuki.

“Bassa kaw ha ngan sin Tuhan mo”
Pagtuntut ilmu agama, sin Tuhan siyukat katu’niyu.

“Bassa kaw ha ngan sin Tuhan mo”
Qur’an subay ukabun bassahun dihilan natu waktu.

Qur’an pangadjiun ha kagausan,
Hatihun in maksud sin surah iban kaayat-ayatan.

Bat ha agama Islam bukun awam palpal,
inutinut humati, Ha kaawam ayaw magpasad kumakkal.

Bang mayta nagtuyu’ tuud in kamaumaasan,
Nagluwaslungsad mag-paiskul ha mga kaanakan.

Sabab sin miyumuhutmuhut ha kabuhi dunya,
Kaaw’anakan dumayaw in kabuhianan magparasahan sila.

Damikkiyan in pagtuntut ilmu agama Islam,
Dunya akhirat hi baran da in dumayaw parasahan.

Awun riwayat laung sin sila faham:
“In   pagtuntut   ilmu,   wajib   ha   muslim   katan”
Ini in banda katu sin Nabi Muhammad (saw) junjungan.

Nabi Muhammad (saw) pilihan subay pagtaatan,
Mga sahabat, tabiin, salaf pamandu niya biyaugbugan.

Nabi Muhammad  (saw)  pilihan  subay  pagtaatan,
Ha kawul, piil, iban aadat niya dimagbus in Qur’an.

Hangkan  ayaw   naman   kita   maghaman’haman,
Dihilan ta waktu, Manuntut kita ilmu agama islam.

Qur’an iban hadith in baugbugan pahamun maraw,
Dunya iban akhirat hi baran da in magkapunyahan.

In mahuli, wassalam.. Allahu a’lam.