kaagi hi iblis sumasat

In kaagi hi iblis manasat,
Magkaga’kaga’ humigunghagas,

Higunghagas bukun pa ma’siyat,
Bang biyah pikilpikilun sasaat.

Higunghagas gamman pa marayaw,
Biyah manabangtabang in papanaw,

Pikilan wainaumamu dihilan kaw,
Inut’inut kaniya pakahagarun kaw.

Kissa kan Barsisa hambuuk misal,
Nagmamabuga pa Allah Aabid marayaw.

Papanaw wai kulanas sin iblis,
Nakazina, nakaanyaya, nakapagshirk.

Damikkiyan waktu sin nabi Nuh (as),
Hinda Wad Suwa Yaghut Yauq iban Nasr.

Mga manusiya mulliya in pag-Tuhan,
Sabab landu’lasa kanila sin kauman,

Papanaw wai kulanas sin iblis,
Nahinang sila tuhan in manusiya nagshirk.

Laung sin kaibanan Biya’ shirk na sadja yan,
Ilmu namu dagpak di kami magawa ha yan.

Aykaw tuan! in nabi Ibrahim (as) gagandilan,
Nagmasusa ha anakapu niya ha shirk yan.

Ha laum kahalubiluhan

Naalunggu’ naapissuku’ nanglalammahan,
Misan   iyunu  sin  atu  wairuun  mahinang.

Susa in kahalan sin raayat muslim kimangi,
Sibu’ da ha hula’ nila sampay  nag-refugee.

Diyuruy’ruy  na   sadja   kailu  madtu-mari,
Hansul-pangatayan kasusahan in bibit’bit.

In kaibanan bahasa ha kaayban sin Islam nagmahi,
Biya ampa na pa kabiyasan pa kahinaan mangdahi.

Bang  piyusat na  sin timbak bomb taas baba’,
Wayna mahinang sa tumapuk pa lungag lupa’.

In  sila tagama timatapuk mapagun  in  paksul,
In mahadjana saw’sagnat tumangkis naahiyul.

Napusat nalarak na kailu  sin bomb in kauman,
In miyaksud bunuun biya’ amura in parasahan.

Makakadtu makapamunu pa bahasa pa mga france,
Hula’  pila  billion  pilak  in  spy  nila  giyagastuhan.

Hikadtu ta pa lupa’ sug sibu da  in  kahantang,
Di kaunun sin akkal sa’ waiyra kita mahinang.

Hi  siyu  na  baha’  in  katuklugan  ta  pagsusunan?
Hinda nakura kaafir atawa taymanghud ha Islam?

Sunnah sin nabi Muhammad (saw) in magpangusihat,
Bang  awun  parkala  pa  puunan kita  madtu  umingat.

Labiluba pa mga sila kiyaatasan  kawasa  humusay,
Sin gumun-buta kahalan pakaradjaan sin kauman.

Ayaw magtukud’tukud bang wairuun pariksa mattan,
Sabab in himumungan tukud’tukud  na puting sayan.

Ala kulli hal, tatkala uno’uno na aramala jimatu,
In yaun  qadar tiyugut  sin Allahu taala  tartantu.

Huwat malaingkan   in  Allah  labi  panday  pandikal,
Labi makahati maingat magpaamu’amu sin kahalan.

Mayta in muslim biya ha laum sadja kabinsanaan?
Uno baha’  in sambung Niya  ha  laum sin  Qur’an?

Ha surah At-Talaq in  aun kabuga  Kaniya jiyanjian,
Jiyanjian kahijjatulan sin uno’uno na pagmasukkal.

“Hi siyu’siyu in sabunnal tuud nag-mamabuga (pa Allah)”
“Hinangan siya (sin Allah) guguwaan (hikalappas kaniya)”

“Iban  iyatasan  siya (sin Allah)   (rizziqi)  tulungtabang”
“Daing ha mga tiranan di’ niya magkatali maimangkan.”

“Hi siyu’siyu  gawgut  in  pangandul  tawakkal  pa  Allah”
“Hina’bu na kaniya tuput in Allah (subhanahu wa taala)”

“Sabunnal tuud madauhat sin Allah in maksurun Niya”
“Ubus na tiyutat sin Allah in katan iban sukuran niya.”

Ha kahawpuan makawa ta ha ayat nasabbut pangadjian,
Bang  kita biyutang  sin  Tuhan  pa  laum kahalubiluhan.

Tartantu  in  kahalubiluhan kimugdan  tungbas sin  kakahinang,
Hangkan ayaw maglawag sin palsababan hituklug  pa  kaibanan.

Asubuhun in baran bang  nagmabuga  da  sabunnal pa Tuhan?
Asubuhun in kahalan sin pag-agama sin muslim ha  kauman?

Sahingga di pabuntulun pakusugun in pag-agama sin muslim katan,
Naalunggu’ naapissuku nanglalammahan wairuun da kita mahinang.

Ti’musun ta  diy ha  hambuuk  salingkat’lingkat  bulansang.
Nasihat sin junjungan Muhammad (saw) kan Ibn Abbas (ra),

“Misan pa tipunun in kusug-kawasa sin manusiya katan,”
“bat dihilan kaw kapunyahan, Di’  nila  ra  kaw  karihilan.”
“Huwatmalaingkan bang in yaun qadar kaymu sin Tuhan.”

“Misan  pa  tipunun  in  kusug-kawasa  sin  manusiya   katan,”
“bat anyayahun nila kaw, Di’da sila makaanyaya kaymu tuan.”
“Huwatmalaingkan bang amuna in qadar mo daing ha Tuhan.”